你好治療師: 隨著時間過去，我發現自己喺適應呢邊嘅生活真係好大嘅挑戰...

你好治療師，

啱啱移民咗英國年半，本身對移民抱住好大嘅希望。但係，隨著時間過去，我發現自己喺適應呢邊嘅生活真係好大嘅挑戰。我原本係一名測量師，喺移民之前，我諗住自己可以順利搵返一份適合我技能同資格嘅工。但係，現實情況俾我預期相差好遠。雖然我盡咗力去搵同埋有相關嘅資格，但係我仍然好難搵到滿足我期望同可以充分運用我專業知識嘅工作。而家我係一間算係測量公司嘅公司到做緊文職。我遇到咗好多障礙，例如唔熟悉嘅語言、唔同嘅職場文化同埋唔再好似以前咁有班啱傾嘅同事。而家嘅情況同我喺飛過黎之前所期待嘅職責同發展機會之間有好大嘅落差。

呢個情況對我嘅整體幸福感有好大嘅負面影響，令我感到好失望同埋缺乏自信。連同去阿女學校家長日我都唔敢去，因為咁仲同老婆嘈，呢d都影響咗我對工作嘅動力，呢啲情況好令人沮喪，因為我一直以黎對工作都係滿懷熱誠同埋奉獻精神。

我而家覺得好迷茫，唔知應該點樣改善我嘅工作狀況，重拾對工作嘅滿足感同埋目標感。

無名氏

你好無名氏，

好多謝你嘅來信，亦都好多謝你同我哋分享你目前嘅經歷同埋感受緊嘅情緒。移民可能會對我哋帶好多令人興奮同正面嘅改變，但事實係移民同時都係非常具挑戰性嘅人生改變。

喺信裏面你哋提及到嘅一啲細節裏面睇得到你似乎對工作有一份好大嘅熱誠同埋目標，但而家嘅處境令你無辨法充分發揮你嘅知識同技能。作為一位有經驗的測量師，你目前嘅工作狀況一定唔容易去接受。你唔可以完全發揮自己的專業知識和技能，令你感到被無視同埋貶低咗你嘅能力。我可以完全理解到你嘅失望和迷茫。適應新環境，文化同埋語言都需要好長嘅時間。當遇到現實情況同自己原本嘅期望有出入嘅時候，感覺到失望同無力感好正常，所以先唔好對自己太過嚴厲。要記住，你而家嘅情況只係暫時，即使咁困難嘅生活你都可以渡過到一年半先至尋求意見證明咗你係一個堅強同有毅力嘅人。

你目前嘅工作狀況確實比你原先想像中既比較遜色，呢一點係無可厚非，亦都係影響你情緒最大嘅主要原因。但係同時，我地都唔可以用而家感受到嘅負面情緒去完全定義自己。無論你而家做緊乜嘢行業，你都係一個有經驗嘅測量師，仍然擁有作為測量師嘅專業知識同埋技能，呢啲都係你嘅寶貴資產，無任何人可以拎得走。

相信同大部份選擇移民嘅人一樣，希望移民之後可以為你同家人帶黎更好嘅生活同埋發展機會。呢個可能係你當初選擇移民嘅最大原因同動力。每當感到無助嘅時候，你可以試試反思一下你一年半前移民時候嘅個份初心，回顧一下過去一年半除咗自己喺工作上遇到唔如意之外，家人過成點呀？小朋友返學開心嗎？咁做除咗可以提醒自己最初移民嘅目的之外，亦都可以去留意一下移民後帶黎嘅一啲其他正面改變。

係工作上，你有冇考慮過主動去同上司溝通一下，表達自己希望可以參與更多技術工作？可以睇下公司有無相關嘅培訓課程或者工作機會，等你有機會展現自己？同時，會唔會可以利用工作上有嘅空閒時間去research一下如果想係英國做測量師要點做？人類始終都係社交動物，你喺工作環境裏面未能建立到人際關係一定令你感受到一份孤獨感，個種感覺非常唔好受。試吓將注意力集中在自己能夠掌控嘅事上面，唔好過於糾結喺暫時改變唔到嘅外在環境因素。例如試吓參加當地測量師交流小組或其他網上嘅群組，增進你嘅語言能力同豐富你嘅人際網路。不妨就從小事做起，主動同同事打招呼或者提供協助，可能咁樣可以幫你建立關係同埋對你嘅情緒都會有好處。你亦可以安排網上聚會同你以前嘅同事聚下舊,如果你準備好嘅話,都可以舊同事分享你目前嘅掙扎。

你唔需要迫自己一定要去完全適應新環境。適應係一個過程，學習去接受適應呢個過程係會有起有跌，需要時間同持續嘅努力。但係只要你專注於自己可以控制嘅部分，就可以慢慢改變現狀，建立更好嘅工作關係同生活。雖然一時半刻可能未必見到明顯效果，但每日去試少少，慢慢你就會開始感受到關係嘅改善同情緒上嘅好處。

試吓定立一啲短期可實現嘅細目標。例如，每星期用一個鐘頭去學英文，或者參加一次測量師嘅交流活動。我相信只要您放慢腳步，試吓用另外一個心態去面對，一步一步調整自己的內在態度，相信終有一日你一定會收到回報。可能你會有時感到失望同埋低落，喺嗰陣時盡量嘗試冋自己講："我會一步一步克服呢個困難，相信之後一定會變好。”

Dr. Hei Chang, PsyD, CPsychol, AFBPsS

Co-founder of BHKPS

「你好治療師」僅供參考，不能替代專業醫療建議。任何健康問題，請務必徵詢您的醫生、心理專業人士或其他合資格的健康提供者。「你好治療師」不構成醫療建議，也不能替代專業醫療建議、診斷或治療。